ایبٹ آباد میں ٹریفک نظام کی بہتری کے لیے بڑا اقدام — “پہچان” ایپ کا دائرہ کار وسیع.

ایبٹ آباد: ٹریفک پولیس ایبٹ آباد نے شہریوں کے تحفظ اور ٹرانسپورٹ کے نظام کو جدید تقاضوں سے ہم آہنگ بنانے کے لیے ایک اہم اور مؤثر قدم اٹھایا ہے۔ ایس ایس پی ٹریفک ایبٹ آباد محمد اشتیاق کی خصوصی ہدایات پر جدید ٹریفک اپلیکیشن “پہچان” کے دائرہ کار کو مزید وسیع کر دیا گیا ہے، جس کے تحت اب موٹر سائیکل سواروں کے بعد لوکل کیری ڈبہ گاڑیوں (لوکل ٹیکسی) کی رجسٹریشن کا باقاعدہ آغاز کر دیا گیا ہے۔
ایس ایس پی ٹریفک محمد اشتیاق نے شہر کے مختلف اہم مقامات کا دورہ کیا اور خود موقع پر جا کر رجسٹریشن کے عمل کا تفصیلی جائزہ لیا۔ اس دوران انہوں نے افسران اور عملے کو ہدایات جاری کیں کہ رجسٹریشن کے عمل کو نہ صرف تیز بنایا جائے بلکہ اس میں مکمل شفافیت بھی یقینی بنائی جائے تاکہ عوام کو کسی قسم کی دشواری کا سامنا نہ ہو۔
انہوں نے اس موقع پر گفتگو کرتے ہوئے کہا کہ جدید ٹیکنالوجی کا استعمال وقت کی اہم ضرورت بن چکا ہے، اور “پہچان” ایپ کے ذریعے ٹریفک کے نظام کو بہتر، منظم اور محفوظ بنایا جا سکتا ہے۔ ان کا کہنا تھا کہ یہ ایپ مستقبل میں شہریوں کی سہولت اور سیکیورٹی کے لیے ایک سنگِ میل ثابت ہوگی۔
ٹریفک پولیس کے مطابق اس مہم کو مرحلہ وار پورے شہر میں وسعت دی جائے گی، جس کے تحت تمام موٹر سائیکلوں اور پبلک سروس گاڑیوں کو اس ڈیجیٹل نظام میں شامل کیا جائے گا۔ اس اقدام کا بنیادی مقصد ٹرانسپورٹ کے شعبے کو باقاعدہ بنانا، غیر رجسٹرڈ گاڑیوں کی روک تھام کرنا، اور کسی بھی ناخوشگوار واقعے کی صورت میں فوری ردعمل کو ممکن بنانا ہے۔
مزید برآں، اس جدید نظام کے ذریعے گاڑیوں اور ڈرائیورز کا مکمل ڈیٹا محفوظ ہوگا، جس سے جرائم کی روک تھام اور مشتبہ سرگرمیوں کی نگرانی میں بھی مدد ملے گی۔ شہریوں کے لیے محفوظ، منظم اور قابلِ اعتماد ٹرانسپورٹ کی فراہمی اس اقدام کا بنیادی ہدف ہے۔
ٹریفک پولیس ایبٹ آباد نے شہریوں، ڈرائیورز اور ٹرانسپورٹرز سے اپیل کی ہے کہ وہ اس مہم میں بھرپور تعاون کریں اور اپنی گاڑیوں کی بروقت رجسٹریشن یقینی بنائیں تاکہ شہر میں ایک محفوظ اور مثالی ٹریفک نظام قائم کیا جا سکے۔