📍 مانسہرہ: تمباکو کنٹرول کے حوالے سے اہم اجلاس، قوانین پر سختی سے عملدرآمد کا فیصلہ.

مانسہرہ: ڈپٹی کمشنر مانسہرہ کی خصوصی ہدایات پر اسسٹنٹ کمشنر مانسہرہ محترمہ ثناء فاطمہ کی زیرِ صدارت تمباکو کنٹرول کے حوالے سے ایک اہم اجلاس منعقد ہوا، جس میں متعلقہ اداروں اور اسٹیک ہولڈرز نے شرکت کی۔







اجلاس میں تمباکو نوشی کی روک تھام، کم عمر بچوں کو تمباکو مصنوعات کی فروخت پر مکمل پابندی، عوامی مقامات پر سگریٹ نوشی کے تدارک اور انسدادِ تمباکو قوانین پر مؤثر عملدرآمد کے حوالے سے تفصیلی غور کیا گیا۔
اس موقع پر اسسٹنٹ کمشنر ثناء فاطمہ نے ہدایت جاری کرتے ہوئے کہا کہ نوجوان نسل کو تمباکو نوشی کے مضر اثرات سے بچانا ہم سب کی مشترکہ ذمہ داری ہے۔ انہوں نے اس عزم کا اظہار کیا کہ ایک صحت مند معاشرے کے قیام کے لیے تمام ادارے اپنی ذمہ داریاں احسن انداز میں ادا کریں۔
انہوں نے مزید واضح کیا کہ تمباکو کنٹرول قوانین کی خلاف ورزی کرنے والوں کے خلاف بلا امتیاز کارروائی عمل میں لائی جائے گی اور کسی کے ساتھ نرمی نہیں برتی جائے گی۔
اجلاس کے شرکاء نے بھی اس عزم کا اعادہ کیا کہ قوانین پر سختی سے عملدرآمد یقینی بنایا جائے گا اور عوام میں شعور بیدار کرنے کے لیے مشترکہ اقدامات کیے جائیں گے تاکہ مانسہرہ کو ایک صحت مند اور محفوظ ضلع بنایا جا سکے۔
📌 اہم نکات:
تمباکو نوشی کے خلاف سخت اقدامات کا فیصلہ
کم عمر افراد کو تمباکو مصنوعات کی فروخت پر پابندی
عوامی مقامات پر سگریٹ نوشی کے خلاف کارروائی
قوانین کی خلاف ورزی پر بلا امتیاز ایکشن
عوامی آگاہی مہم شروع کرنے پر اتفاق