بٹگرام : نائب قاصد ڈی سی آفس بٹگرام جناب انور فراز نہ صرف ایک سرکاری ملازم تھے بلکہ ایک ایسا معتبر نام تھے جو وقت کی پابندی، بے لوث ایمانداری، خلوص اور بھائی چارے کی روشن مثال بن کر برسوں تک ڈی سی آفس بٹگرام کی پہچان رہے۔ اپنی طویل اور باوقار مدتِ ملازمت مکمل کرنے کے بعد آج وہ باعزت انداز میں رخصت ہوئے، مگر ان کی محنت، اخلاق اور خدمت کا نقش ہر دل پر ہمیشہ زندہ رہے گا۔
جناب انور فراز نے اپنی پوری زندگی عوامی خدمت اور دفتری ذمہ داریوں کو عبادت سمجھ کر نبھایا۔ ان کا نرم لہجہ، خوش اخلاقی اور فرض شناسی نہ صرف ساتھی ملازمین بلکہ آنے والے سائلین کے لیے بھی باعثِ سکون رہی۔ وہ دفتر کی دیواروں کے بیچ ایک خاموش مگر مضبوط ستون کی مانند تھے، جن کی موجودگی نظم و ضبط اور وقار کی علامت سمجھی جاتی تھی۔
ان کی خدمات کے اعتراف میں ڈپٹی کمشنر بٹگرام جناب اشتیاق احمد اور ڈی سی آفس کے تمام سٹاف کی جانب سے منعقد کی جانے والی شایانِ شان الوداعی تقریب ایک یادگار لمحہ بن گئی۔ اس موقع پر ساتھی ملازمین نے دل کی گہرائیوں سے ان کی خدمات کو خراجِ تحسین پیش کیا، تحائف دیے اور پھولوں کے ہار پہنا کر اپنی محبت اور قدردانی کا اظہار کیا۔
تقریب سے خطاب کرتے ہوئے ڈپٹی کمشنر بٹگرام نے اس امر پر زور دیا کہ ریٹائرڈ ملازمین ہمارے اداروں کا سرمایہ ہوتے ہیں، اور جب بھی انہیں کسی دفتری کام کی ضرورت ہو تو نہایت عزت و احترام اور مکمل پروٹوکول کے ساتھ ان کا کام کیا جانا چاہیے، کیونکہ یہی وہ لوگ ہیں جنہوں نے اپنی زندگی کا قیمتی حصہ عوام کی خدمت میں صرف کیا ہوتا ہے۔
پروگرام کے اختتام پر ڈپٹی کمشنر بٹگرام کی خصوصی ہدایات پر جناب انور فراز کو سرکاری گاڑی اور پولیس پروٹوکول کے ہمراہ گاڑیوں کی ریلی کی صورت میں ان کے گھر تک باعزت رخصت کیا گیا۔ یہ منظر نہ صرف جذبات سے بھرپور تھا بلکہ بٹگرام کی تاریخ میں احترام، قدردانی اور انسانی وقار کی ایک درخشاں مثال کے طور پر ہمیشہ یاد رکھا جائے گا۔
دعا ہے کہ اللہ تعالیٰ جناب انور فراز کو زندگی کے آئندہ ایام صحت، سکون، خوشحالی اور عزت و وقار کے ساتھ گزارنے کی توفیق عطا فرمائے۔ آمین۔
