ایبٹ آباد: ڈسٹرکٹ ہسپتال میں ڈاکٹروں کی مبینہ نااہلی، بچے حسنین کی ہلاکت پر ہزارہ ایکشن کمیٹی کا شدید احتجاج

ایبٹ آباد: ڈسٹرکٹ ہسپتال ایبٹ آباد میں ایک دلخراش واقعہ پیش آیا جس میں گل ڈھوک کے معصوم بچے حسنین کی دورانِ آپریشن موت ہوئی۔ والدین کے مطابق یہ واقعہ ہسپتال میں موجود بعض ڈاکٹروں کی مبینہ لاپرواہی اور پیشہ ورانہ غفلت کے باعث پیش آیا۔ واقعے کے فوری بعد والد نے انصاف کے لیے آواز بلند کی، جس پر ہزارہ ایکشن کمیٹی متحرک ہوئی اور والدین کے ہمراہ احتجاجی مظاہرہ کیا۔ مظاہرے کے دوران ڈپٹی کمشنر ایبٹ آباد سے ملاقات کی گئی اور والدین نے اپنے مطالبات پیش کرتے ہوئے اعلیٰ سطحی انکوائری کمیٹی کے قیام کا مطالبہ کیا تاکہ ذمہ دار افراد کی شفاف اور بروقت شناخت ہو سکے۔
مطالبات کے تحت تشکیل دی گئی انکوائری کمیٹی نے واقعے کا تفصیلی جائزہ لیا اور اپنی رپورٹ میں ڈسٹرکٹ ہسپتال کے متعلقہ ڈاکٹروں کو قصوروار قرار دیا۔ کمیٹی نے سفارش کی کہ حسنین کی ہلاکت میں ملوث تمام افراد کے خلاف فوری اور مؤثر قانونی کارروائی کی جائے اور ہسپتال انتظامیہ کی غفلت کا بھی ازالہ کیا جائے۔ رپورٹ میں یہ بھی تجویز کیا گیا کہ ڈسٹرکٹ ہسپتال میں خدمات انجام دینے والے ڈاکٹروں اور پیرامیڈیکل اسٹاف کی پروفیشنل ڈگریوں اور تربیت کا مکمل جائزہ لیا جائے تاکہ مستقبل میں ایسے افسوسناک واقعات کی روک تھام ممکن ہو۔
آج ہزارہ ایکشن کمیٹی نے ڈپٹی کمشنر ایبٹ آباد سے دوبارہ ملاقات کی اور اپنی تمام تر سفارشات اور مطالبات پیش کیے۔ اس موقع پر کمیٹی نے زور دیا کہ حسنین کے والدین کو فوری انصاف فراہم کیا جائے، ہسپتال میں پیشہ ورانہ غفلت کے مرتکب افراد کے خلاف سخت کارروائی عمل میں لائی جائے، اور ڈسٹرکٹ ہسپتال میں مریضوں کی حفاظت اور طبی معیار کو یقینی بنانے کے لیے جامع اقدامات کیے جائیں۔