شاہین شاہ آفریدی کا ون ڈے کرکٹ میں بڑا اعزاز، 80 میچز میں 150 وکٹیں مکمل کرلیں

لاہور: پاکستان ون ڈے ٹیم کے کپتان اور فاسٹ بولر شاہین شاہ آفریدی نے ون ڈے انٹرنیشنل کرکٹ میں 150 وکٹیں مکمل کرکے اہم سنگ میل عبور کرلیا۔ انہوں نے یہ اعزاز اپنے 80ویں ون ڈے انٹرنیشنل میچ میں حاصل کیا، جس کے ساتھ وہ یہ کارنامہ انجام دینے والے پاکستان کے تیز ترین فاسٹ بولر بن گئے۔
قذافی اسٹیڈیم لاہور میں انگلینڈ کے خلاف سہ ملکی سیریز کے دوسرے میچ کے دوران شاہین آفریدی نے انگلش اوپنر ٹام بینٹن کو اننگز کے پہلے ہی اوور میں آؤٹ کرکے اپنی 150ویں ون ڈے وکٹ حاصل کی۔
ٹام بینٹن گزشتہ چار اننگز میں مسلسل چار نصف سنچریاں اسکور کرچکے تھے، تاہم شاہین آفریدی کی فل لینتھ گیند پر وہ کور کے علاقے میں کیچ دے بیٹھے، جس سے شاہین نے اہم سنگ میل اپنے نام کرلیا۔
اعداد و شمار کے مطابق پاکستان کے سابق فاسٹ بولرز وقار یونس اور شعیب اختر نے 91، 91 میچز میں 150 ون ڈے وکٹیں مکمل کی تھیں، جبکہ شاہین آفریدی نے یہ کارنامہ 80 میچز میں انجام دیا۔
پاکستانی بولرز میں مجموعی طور پر سابق آف اسپنر ثقلین مشتاق شاہین آفریدی سے آگے ہیں، جنہوں نے صرف 78 ون ڈے میچز میں 150 وکٹیں مکمل کی تھیں۔
عالمی سطح پر بھی شاہین آفریدی کا یہ اعزاز نمایاں ہے۔ دستیاب اعداد و شمار کے مطابق نیپال کے سندیپ لامیچھانے نے 73 میچز میں، جبکہ آسٹریلیا کے مچل اسٹارک نے 77 میچز میں 150 ون ڈے وکٹیں مکمل کی تھیں۔
شاہین آفریدی کی یہ کامیابی ان کی ون ڈے کرکٹ میں مؤثر بولنگ اور پاکستان کے لیے اہم کردار کی عکاسی کرتی ہے۔ ان کے اس سنگ میل کو پاکستانی کرکٹ کے لیے ایک اہم انفرادی اعزاز قرار دیا جا رہا ہے۔