پشاور کے بعد ہزارہ ریجن میں بھی تجاوزات کے خلاف بڑے آپریشن کی تیاریاں، مانسہرہ اور ایبٹ آباد کے بڑے پلازے بھی ممکنہ کارروائی کی زد میں، ایف سی کی تعیناتی پر بھی غور

پشاور کے بعد ہزارہ ریجن میں بھی تجاوزات کے خلاف بڑے آپریشن کی تیاریاں، مانسہرہ اور ایبٹ آباد کے بڑے پلازے بھی ممکنہ کارروائی کی زد میں، ایف سی کی تعیناتی پر بھی غورپشاور: صوبائی سطح پر تجاوزات کے خاتمے کے لیے بڑے پیمانے پر کارروائیوں کی تیاریاں جاری ہیں۔ پشاور میں ضلعی انتظامیہ نے شہر کے مختلف علاقوں، تاریخی مقامات، گرین بیلٹس اور اہم تجارتی مراکز سے تجاوزات ختم کرنے کے لیے آپریشن کا منصوبہ تیار کر لیا ہے، جبکہ ہزارہ ریجن، خصوصاً مانسہرہ اور ایبٹ آباد میں بھی تجاوزات کے خلاف بڑے پیمانے پر کارروائیوں کا امکان ظاہر کیا جا رہا ہے۔
ذرائع کے مطابق پشاور میں آپریشن کے دوران گورنمنٹ کالج چوک، بازارگراں، الیکٹرک مارکیٹ، قصہ خوانی بازار، اندرون شہر اور دیگر اہم مقامات پر قائم غیر قانونی تعمیرات اور تجاوزات کے خلاف کارروائی کی جائے گی۔ انتظامیہ کی جانب سے پرانے نقشوں کی مدد سے تجاوزات کی نشاندہی اور حدود کا تعین کیا جا رہا ہے، جبکہ اب تک مجموعی طور پر 345 تجاوزات کی نشاندہی کی جا چکی ہے۔
دوسری جانب ہزارہ ریجن کے اہم شہروں مانسہرہ اور ایبٹ آباد میں بھی تجاوزات کے خلاف ممکنہ آپریشن کے حوالے سے اہم اقدامات متوقع ہیں۔ خصوصاً مانسہرہ کی شہرِ ریشم (Silk Road) کے دونوں اطراف قائم بڑے بڑے پلازے، کمرشل عمارتیں، دکانیں اور دیگر تعمیرات بھی مجوزہ آپریشن کے دائرہ کار میں شامل کیے جانے کا امکان ہے۔ ذرائع کے مطابق صرف چھوٹی دکانوں اور عارضی تجاوزات ہی نہیں بلکہ سڑک کی مقررہ حدود سے آگے قائم بڑی تجارتی عمارتوں اور پلازوں کی بھی جانچ پڑتال کی جا سکتی ہے۔
اسی طرح ایبٹ آباد اور ہزارہ ریجن کے دیگر اہم تجارتی مراکز میں بھی سرکاری حدود، فٹ پاتھوں اور سڑکوں پر قائم تجاوزات کے خلاف کارروائی متوقع ہے۔
ذرائع کے مطابق ممکنہ آپریشن کے دوران امن و امان برقرار رکھنے اور کارروائی کو مؤثر بنانے کے لیے فرنٹیئر کور (FC) کی تعیناتی کا معاملہ بھی زیرِ غور ہے۔
انتظامیہ کا بنیادی مقصد شہروں کی سڑکوں اور فٹ پاتھوں کو تجاوزات سے پاک کرنا، ٹریفک کی روانی بہتر بنانا، شہریوں کو آمدورفت میں سہولت فراہم کرنا اور سرکاری حدود کو واگزار کرانا ہے۔