مانسہرہ کے گاؤں بکی میں جاپانی تعاون سے صاف پانی کی فراہمی کا منصوبہ مکمل، 6 ہزار سے زائد افراد مستفید ہوں گے

مانسہرہ: جاپان کے تعاون سے ضلع مانسہرہ کے گاؤں بکی میں صاف پینے کے پانی کی فراہمی کا اہم منصوبہ مکمل کرلیا گیا، جس کے تحت علاقے کے 6 ہزار سے زائد رہائشیوں کو پینے کا صاف پانی فراہم کیا جائے گا۔ منصوبے کے لیے جاپان کی حکومت نے 59 ہزار 764 امریکی ڈالر کی مالی معاونت فراہم کی، جبکہ اس منصوبے پر عملی کام فرینڈز ویلفیئر ایسوسی ایشن (FWA) پاکستان نے مکمل کیا۔
منصوبے کا باقاعدہ افتتاح پاکستان میں جاپان کے سفیر اکاماتسو شوئیچی نے کیا۔ افتتاحی تقریب میں رکن خیبر پختونخوا اسمبلی سردار شاہجہان یوسف، ایڈیشنل ڈپٹی کمشنر مانسہرہ اسد محمود لودھی، متعلقہ حکام اور مقامی عمائدین نے شرکت کی۔
منصوبے کے تحت گاؤں بکی میں 6 ہزار 13 میٹر طویل مرکزی پائپ لائن بچھائی گئی ہے، جبکہ پانی کو ذخیرہ کرنے اور فراہمی کے نظام کو مؤثر بنانے کے لیے انٹیک ٹینک بھی تعمیر کیا گیا ہے۔ اس منصوبے کی تکمیل سے مقامی آبادی کو صاف اور محفوظ پینے کے پانی تک رسائی حاصل ہوگی، جس سے روزمرہ زندگی میں نمایاں سہولت متوقع ہے۔
افتتاحی تقریب سے خطاب کرتے ہوئے جاپانی سفیر اکاماتسو شوئیچی نے منصوبے کی کامیاب تکمیل پر فرینڈز ویلفیئر ایسوسی ایشن پاکستان کو مبارکباد پیش کی۔ انہوں نے کہا کہ صاف پانی تک رسائی انسانی زندگی، صحت اور پائیدار ترقی کے لیے بنیادی اہمیت رکھتی ہے۔
جاپانی سفیر کا کہنا تھا کہ اس منصوبے سے خصوصاً خواتین اور بچیوں کو دور دراز مقامات سے پانی لانے کی روزمرہ مشقت سے نجات ملے گی، جس سے انہیں تعلیم، گھریلو ذمہ داریوں اور دیگر مثبت سرگرمیوں کے لیے زیادہ وقت میسر آئے گا۔ اس کے علاوہ صاف پانی کی دستیابی سے بچوں اور مقامی آبادی کی صحت اور مجموعی معیارِ زندگی میں بہتری آنے کی توقع ہے۔
منصوبے کو طویل المدتی بنیادوں پر فعال رکھنے اور اس کی بہتر دیکھ بھال کو یقینی بنانے کے لیے مقامی سطح پر 20 ارکان پر مشتمل واٹر، سینی ٹیشن اینڈ ہائیجین (WASH) کمیٹی بھی قائم کی گئی ہے۔ کمیٹی کے ارکان کو پانی کے معیار کی نگرانی، صفائی ستھرائی اور پانی کی فراہمی کے نظام کی دیکھ بھال سے متعلق تربیت فراہم کی گئی ہے، تاکہ منصوبے کو مستقبل میں بھی مؤثر انداز میں جاری رکھا جا سکے۔
جاپانی سفیر نے اس موقع پر پاکستان کی سماجی اور پائیدار ترقی کے لیے تعاون جاری رکھنے کے عزم کا اظہار کرتے ہوئے امید ظاہر کی کہ گاؤں بکی میں صاف پانی کی فراہمی کا یہ منصوبہ پاکستان اور جاپان کے درمیان دوستانہ تعلقات اور باہمی تعاون کی ایک دیرپا علامت ثابت ہوگا۔
واضح رہے کہ جاپان کے تعاون سے مکمل ہونے والا یہ منصوبہ مانسہرہ کے دیہی علاقے میں بنیادی سہولیات کی فراہمی اور ہزاروں افراد کے معیارِ زندگی کو بہتر بنانے کی جانب ایک اہم پیش رفت ہے۔