اسکاؤٹس کیڈٹ کالج بٹراسی کے کیڈٹس کا آئی ایس پی آر کا دورہ، شہداء کی قربانیوں کو خراجِ عقیدت

بٹراسی/اسلام آباد: اسکاؤٹس کیڈٹ کالج بٹراسی کے کیڈٹس نے آئی ایس پی آر (ISPR) کا ایک یادگار دورہ کیا، جہاں انہوں نے ڈائریکٹر جنرل آئی ایس پی آر کے ساتھ خصوصی نشست میں شرکت کی۔ نشست کا مرکزی موضوع افواجِ پاکستان کے شہداء کی لازوال قربانیاں اور ان کی وہ داستانیں تھیں جو نوجوان نسل کے لیے عزم، بہادری اور حب الوطنی کی روشن مثال ہیں۔
اس موقع پر کیڈٹس نے وطنِ عزیز کے دفاع کے لیے اپنی جانوں کا نذرانہ پیش کرنے والے شہداء سے گہری عقیدت اور محبت کا اظہار کیا۔ انہیں شہداء کی قربانیوں، قومی سلامتی اور ملک و قوم کی خدمت کے جذبے کے حوالے سے آگاہی حاصل کرنے کا موقع بھی ملا۔
دورے کے دوران یہ امر باعثِ فخر قرار پایا کہ اسکاؤٹس کیڈٹ کالج بٹراسی کے 300 سے زائد فارغ التحصیل کیڈٹس افواجِ پاکستان کے مختلف شعبوں میں خدمات سرانجام دے رہے ہیں اور ملک و قوم کی خدمت میں اپنا کردار ادا کر رہے ہیں۔
دورے کے اختتام پر کیڈٹس نے ڈی جی آئی ایس پی آر کو ایک خصوصی یادگاری سووینئر پیش کیا، جس میں کیڈٹ کالج بٹراسی کے بہادر شہداء کی تصاویر شامل تھیں۔ یہ سووینئر شہداء کی عظیم قربانیوں، ان کی یاد اور وطن سے محبت کی علامت تھا۔
یہ دورہ نوجوانوں میں حب الوطنی، قومی ذمہ داری اور شہداء کی قربانیوں سے وابستگی کے جذبے کو مزید اجاگر کرنے کے حوالے سے اہمیت کا حامل ہے۔