گورنر خیبرپختونخوا کا سخت بیان، سرحد پار کرنے والوں کو بھرپور جواب دینے کا اعلان

پشاور: گورنر خیبرپختونخوا فیصل کریم کنڈی نے کہا ہے کہ پاکستان کی سرحد پار کرنے والے کسی بھی شخص کو بھرپور جواب دیا جائے گا۔ ان کا کہنا تھا کہ ملکی سرحدوں اور سلامتی کے تحفظ پر کوئی سمجھوتہ نہیں کیا جائے گا۔
پشاور میں میڈیا سے گفتگو کرتے ہوئے فیصل کریم کنڈی نے کہا کہ گزشتہ 13 سال تک اقتدار میں رہنے والوں سے بھی حساب لیا جانا چاہیے، لیکن ہم سے صرف 13 دن کا حساب مانگا جا رہا ہے۔ انہوں نے افغان حکومت پر بزدلانہ حملے کا الزام عائد کرتے ہوئے کہا کہ جو بھی پاکستان کی سرحد عبور کرے گا، اسے بھرپور جواب دیا جائے گا۔
تجاوزات کے معاملے پر دوٹوک مؤقف
تجاوزات کے حوالے سے گفتگو کرتے ہوئے گورنر خیبرپختونخوا نے کہا کہ مشیر اطلاعات نے بھی گزشتہ روز واضح کیا تھا کہ جن افراد نے تجاوزات پر قبضہ کر رکھا ہے، وہ جگہیں خالی کر دیں۔ مفتی محمود مرکز کی حیثیت اور اس سے متعلق معاملات کا فیصلہ متعلقہ انتظامیہ کرے گی۔
فیصل کریم کنڈی کا کہنا تھا کہ جو لوگ دوسروں کو انصاف اور دین کا درس دیتے ہیں، اگر وہ خود قبضہ مافیا کا حصہ بن جائیں تو پھر وہ دوسروں کو کیا سبق دیں گے؟ انہوں نے واضح کیا کہ تجاوزات سے متعلق تمام معاملات متعلقہ محکمہ شفاف انداز میں دیکھ رہا ہے اور وہ کسی کے حق میں سفارش نہیں کریں گے۔
گورنر نے اپنے مؤقف کا اظہار کرتے ہوئے کہا کہ اگر ان کا اپنا گھر بھی تجاوزات کی زد میں آتا ہے تو اسے بھی گرایا جانا چاہیے۔ ان کے مطابق قانون کا اطلاق سب کے لیے یکساں ہونا چاہیے اور کسی کو خصوصی رعایت نہیں ملنی چاہیے۔
دیر کالونی اسکول حادثے کی انکوائری رپورٹ پر اجلاس
دوسری جانب پشاور میں گورنر خیبرپختونخوا فیصل کریم کنڈی کی زیرِ صدارت دیر کالونی اسکول حادثے کی انکوائری رپورٹ کا جائزہ لینے کے لیے اہم اجلاس منعقد ہوا، جس میں رپورٹ کے مختلف نکات پر غور کیا گیا۔
انکوائری رپورٹ میں اسکول کی تعمیر میں ناقص میٹریل کے مبینہ استعمال پر اسکول کے مالک کو ذمہ دار قرار دیا گیا، جبکہ متعلقہ محکموں کی غفلت اور کوتاہیوں کی بھی نشاندہی کی گئی۔
اجلاس میں انکوائری رپورٹ کے نتائج زیرِ بحث آئے، جبکہ واقعے کے حوالے سے متعلقہ حکام کی ذمہ داریوں اور آئندہ کے لائحہ عمل پر بھی توجہ دی گئی۔