مانسہرہ: تجاوزات آپریشن پر جمعیت علماء اسلام کا ردعمل، ’’کیا ایمرجنسی اور گورنر راج غریب ریڑھی بانوں کے لیے نافذ کیا گیا تھا

مانسہرہ: جمعیت علماء اسلام خیبرپختونخوا کے ڈپٹی جنرل سیکرٹری اور جے یو آئی ضلع مانسہرہ کے جنرل سیکرٹری مولانا مفتی ناصر محمود نے تجاوزات کے نام پر غریب ریڑھی بانوں اور تاجر برادری کے خلاف کارروائی پر سخت ردعمل کا اظہار کرتے ہوئے سوال اٹھایا ہے کہ کیا ایمرجنسی اور گورنر راج غریب ریڑھی بانوں اور تاجر برادری کے لیے نافذ کیا گیا تھا؟
مولانا مفتی ناصر محمود کا کہنا تھا کہ غریب محنت کش پہلے ہی مہنگائی اور بے روزگاری کے باعث شدید معاشی مشکلات کا شکار ہیں۔ ایسے حالات میں ان کے روزگار کے ذرائع ختم کرنا ان کی مشکلات میں مزید اضافے کا سبب بن سکتا ہے۔ انہوں نے کہا کہ انتظامیہ کو کارروائی کرتے ہوئے غریب طبقے کے معاشی حالات اور روزگار سے وابستہ مسائل کو بھی مدنظر رکھنا چاہیے۔
انہوں نے واضح کیا کہ تجاوزات کے خلاف کارروائی ضرور کی جائے، تاہم اس عمل میں غریب ریڑھی بانوں، محنت کشوں اور تاجر برادری کے معاشی حقوق کا تحفظ بھی یقینی بنایا جائے۔ ان کے مطابق بازاروں میں نظم و ضبط برقرار رکھنے اور عوامی راستے تجاوزات سے پاک کرنے کے لیے ایسے اقدامات ضروری ہیں جن سے غریب افراد کو غیر ضروری مشکلات کا سامنا نہ کرنا پڑے اور وہ اپنے روزگار سے بھی محروم نہ ہوں۔
مولانا مفتی ناصر محمود نے کہا کہ جمعیت علماء اسلام غریب ریڑھی بانوں، محنت کشوں اور تاجر برادری کے شانہ بشانہ کھڑی ہے۔ انہوں نے مزید کہا کہ عوام کے جائز حقوق کا تحفظ، روزگار کا دفاع اور معاشی مشکلات سے دوچار طبقے کی آواز بلند کرنا ان کی ذمہ داری ہے۔ ان کا کہنا تھا کہ جمعیت علماء اسلام عوامی حقوق کے تحفظ کے لیے ہر متعلقہ فورم پر اپنا مؤقف پیش کرتی رہے گی۔
واضح رہے کہ حال ہی میں اسسٹنٹ کمشنر مانسہرہ ثناء فاطمہ نے مانسہرہ بازار کا دورہ کیا تھا، جہاں سڑکوں کے کناروں پر قائم عارضی تجاوزات، ریڑھی بانوں اور دکانوں کے باہر رکھے گئے سامان کو ہٹانے کے لیے کارروائی کی گئی تھی۔ اس کارروائی کے بعد جے یو آئی کے رہنما نے غریب ریڑھی بانوں اور تاجروں کے معاشی حقوق کو مدنظر رکھتے ہوئے متوازن حکمت عملی اپنانے پر زور دیا ہے۔