مانسہرہ: آن لائن کھلی کچہری میں شہری کی شکایت پر فوری کارروائی، سکول اوقات میں ہیوی ٹریفک پر پابندی کا فیصلہ

مانسہرہ: ریجنل پولیس آفیسر ہزارہ ریجن جہانزیب نذیر خان اور کمشنر ہزارہ ڈویژن شاہ رخ علی کی زیرِ صدارت منعقدہ آن لائن کھلی کچہری میں بالاکوٹ کے شہری کی شکایت پر فوری نوٹس لیتے ہوئے سکول اوقات کے دوران ہیوی ٹریفک کی آمدورفت روکنے کا فیصلہ کیا گیا ہے۔
تفصیلات کے مطابق بالاکوٹ کے ایک رہائشی شہری نے سکول اوقات میں ہیوی ٹریفک کی آمدورفت کے باعث پیش آنے والی مشکلات کی نشاندہی کی تھی۔ شکایت پر ڈی پی او مانسہرہ محمد وقاص خان کی ہدایات پر فوری عملی اقدامات کیے گئے۔
اس سلسلے میں ایس پی سرکل بالاکوٹ صابر خان اور ایس پی ٹریفک مانسہرہ جہانزیب خان کی زیرِ صدارت کرش پلانٹس مالکان اور ہیوی وہیکلز کے مالکان کا اجلاس منعقد ہوا، جس میں لنک روڈ گرلاٹ سمیت دیگر مقررہ مقامات پر سکول اوقات کے دوران ہیوی ٹریفک کی آمدورفت مکمل طور پر بند رکھنے کا فیصلہ کیا گیا۔
فیصلے کے مطابق ہیوی ٹریفک کی آمدورفت صبح 7 بجے سے 9 بجے تک، جبکہ دوپہر 12 بجے سے 2 بج کر 30 منٹ تک معطل رہے گی۔ اس اقدام کا مقصد سکول آنے اور جانے والے بچوں کی حفاظت کو یقینی بنانا اور مصروف اوقات میں ٹریفک کے دباؤ کو کم کرنا ہے۔
ٹریفک اسٹاف اور بالاکوٹ پولیس کو پابندی پر سختی سے عملدرآمد یقینی بنانے کی ہدایات جاری کر دی گئی ہیں، جبکہ کرش پلانٹس اور ہیوی وہیکلز کے مالکان کو بھی مقررہ اوقات کی پابندی کرنے کی ہدایت کی گئی ہے۔
آن لائن کھلی کچہری میں شہری کی شکایت پر فوری کارروائی کو عوامی مسائل کے حل اور بچوں کی حفاظت کے حوالے سے ایک اہم اقدام قرار دیا جا رہا ہے۔ تاہم، فیصلے کے مؤثر نفاذ کے لیے متعلقہ اداروں کی مسلسل نگرانی اور پابندی کی خلاف ورزی پر قانونی کارروائی ضروری ہوگی۔