باغ: تھانہ بگنوتر کی حدود میں واقع محلہ ٹکوری میں فائرنگ کا ایک افسوسناک واقعہ پیش آیا ہے، جس کے نتیجے میں ایک شخص جاں بحق جبکہ اس کا بھائی شدید زخمی ہو گیا۔
ذرائع کے مطابق فائرنگ کے واقعے میں مظہر عباسی ولد شمریز عباسی موقع پر ہی جاں بحق ہو گئے، جبکہ ان کے بھائی جلال عباسی ولد شمریز عباسی شدید زخمی ہوئے ہیں۔ زخمی کو فوری طور پر طبی امداد کے لیے قریبی ہسپتال منتقل کر دیا گیا، جہاں انہیں علاج معالجہ فراہم کیا جا رہا ہے۔
واقعے کی اطلاع ملتے ہی تھانہ بگنوتر پولیس کی نفری موقع پر پہنچ گئی اور جائے وقوعہ کو گھیرے میں لے کر شواہد اکٹھے کرنا شروع کر دیے۔ پولیس نے واقعے کی مختلف پہلوؤں سے تحقیقات کا آغاز کر دیا ہے جبکہ فائرنگ کے محرکات اور اس میں ملوث افراد کے تعین کے لیے قانونی کارروائی جاری ہے۔
پولیس حکام کا کہنا ہے کہ ابتدائی معلومات اور شواہد کی روشنی میں تفتیش آگے بڑھائی جا رہی ہے اور واقعے کے ذمہ دار عناصر کو قانون کے کٹہرے میں لانے کے لیے تمام ضروری اقدامات کیے جائیں گے۔
علاقے میں پیش آنے والے اس افسوسناک واقعے پر اہلِ علاقہ نے گہرے دکھ اور افسوس کا اظہار کیا ہے۔
