اسلام آباد: شادی سے ناخوش بیٹی کے قتل کا مقدمہ درج، والد گرفتار.

اسلام آباد (ویب ڈیسک) – تھانہ نیلور کی حدود میں ایک خاتون کو مبینہ طور پر والدین نے قتل کردیا۔ پولیس نے مقدمہ درج کرکے مقتولہ کے والد کو گرفتار کرلیا ہے۔
پولیس ذرائع کے مطابق مقتولہ حنا کا تعلق لاہور سے تھا اور اس کی شادی نوید حسن نامی نوجوان سے اس کی مرضی کے خلاف کی گئی تھی۔ حنا شادی سے ناخوش تھی اور اس نے عدالت سے خلع لے لیا تھا ۔ 13 اگست کو اس کے والد اسے لاہور سے اسلام آباد لے کر آئے، جہاں اہلخانہ نے اسے قتل کردیا۔
خاندانی ذرائع کا کہنا ہے کہ والد نے بیٹی کو معاہدے پر گھر لایا کہ اسے کوئی نقصان نہیں پہنچایا جائے گا، تاہم گھر پہنچتے ہی اسے قتل کردیا گیا۔ اس قسم کے واقعات میں اکثر خاندان مفاہمت کرلینا چاہتے ہیں، جس سے مجرمان کو سزا نہیں مل پاتی ۔
پولیس نے مقدمہ درج کرکے مقتولہ کے والد کو حراست میں لے لیا ہے اور مزید تفتیش جاری ہے ۔