مانسہرہ: شہری قبرستانوں کے لیے دور دراز زمین کا نوٹیفکیشن منسوخ کرنے کا حکم.

مانسہرہ (ویب ڈیسک) – چیف سیکرٹری خیبر پختونخوا نے ڈپٹی کمشنر مانسہرہ کو ہدایت کی ہے کہ ضلع کی چار شہری یونین کونسلوں کے قبرستانوں کے لیے دور دراز علاقوں میں حاصل کی جانے والی زمین کا نوٹیفکیشن فوری منسوخ (de-notify) کیا جائے۔
مسلم لیگ (ن) کے رہنما اور سابق رکن صوبائی اسمبلی سردار ظہور نے میڈیا سے گفتگو کرتے ہوئے بتایا کہ سابق وزیراعظم نواز شریف نے سنہ 2016 میں چار شہری یونین کونسلوں میں قبرستانوں کی تعمیر اور زمین کی خریداری کے لیے 20 کروڑ روپے کے فنڈز جاری کیے تھے۔ تاہم ضلع انتظامیہ نے حال ہی میں شہری آبادی سے کافی دور اور ناقابلِ رسائی دیہات میں زمین کے حصول کے نوٹیفکیشن جاری کر دیے تھے، جس پر چیف سیکرٹری نے فوری نوٹیفکیشن واپس لینے کی ہدایت جاری کی ہے۔
انہوں نے مزید بتایا کہ وفاقی وزیر برائے مذہبی امور سردار محمد یوسف نے وزیراعظم شہباز شریف سے ملاقات کے دوران دور دراز علاقوں میں زمین کی خریداری پر شہری یونین کونسلوں کے رہائشیوں اور عوام میں پائی جانے والی شدید تشویش سے آگاہ کیا تھا، جس کے بعد یہ اقدام اٹھایا گیا۔
واضح رہے کہ شہری یونین کونسلوں کے رہائشیوں کا کہنا ہے کہ قبرستانوں کے لیے شہری آبادی کے قریب ہی زمین مختص کی جانی چاہیے تاکہ عوام کو رسائی میں آسانی ہو۔ انہوں نے ضلع انتظامیہ کے اس اقدام کو سراہا ہے اور مطالبہ کیا ہے کہ قبرستانوں کے لیے مناسب اور قریبی زمین کا انتخاب کیا جائے۔