کولئ پالس کوہستان: انسپکٹر جنرل آف پولیس خیبرپختونخوا ذوالفقار حمید کے وژن اور ڈی آئی جی ہزارہ ناصر محمود ستی کے احکامات پرڈسٹرکٹ پولیس آفیسر کولئی پالس کوہستان امجد حسین کی خصوصی ہدایت پر،ایس ایچ او تھانہ کولئی فضل الرحمان نے ہمراہ پولیس نفری کے تھانہ کولئی کی حدود کے ایک دُور دراز اور دشوار گزار پہاڑی علاقے میں خفیہ اطلاع پر کارروائی کی۔
اطلاع کے مطابق اس علاقے میں بھنگ کی غیر قانونی کاشت کی گئی تھی، جسے کاٹ کر ایک مقام پر جمع کیا گیا تھا اور خشک کرکے چرس بنانے کی تیاری کی جا رہی تھی۔
پولیس پارٹی نے موقع پر پہنچ کر بھنگ کے ذخیرے کو نذرِ آتش کر کے تلف کر دیا۔
مزید کارروائی کے دوران ایک نامزد ملزم کی شناخت دندو ولد پدو قوم چھلیس خیل سکنہ پھسرو کے طور پر ہوئی۔
ملزم کے خلاف قانونی کارروائی جاری ہے اور گرفتاری کے لیے چھاپے مارے جا رہے ہیں۔
ڈسٹرکٹ پولیس کولئی پالس کوہستان کا مؤقف واضح ہے کہ
منشیات کے مکروہ دھندے میں ملوث عناصر کے خلاف کارروائی میں کوئی کمی نہیں کی جائے گی، ان کے لیے کوئی رعایت نہیں ہوگی۔
یہ عناصر ہماری آنے والی نسلوں کے دشمن ہیں، اور ایسے لوگوں کو اس ضلع میں کسی صورت برداشت نہیں کیا جائے گا۔
عوام سے اہم اپیل:
ضلع کولئی پالس کوہستان کے باشعور، عزت دار اور شریف لوگوں سے گزارش ہے کہ آپ اپنے معاشرے کو منشیات جیسے ناسور سے محفوظ رکھنے میں پولیس کا ساتھ دیں۔
بعض بیرونی عناصر آپ کے پرامن علاقے میں آ کر منشیات کی کاشت یا فروخت کے ذریعے معاشرے کو خراب کرنے اور نوجوان نسل کو تباہ کرنے کی کوشش کرتے ہیں۔
لہٰذا اگر آپ کو ایسی کسی سرگرمی یا بھنگ کی کاشت کے بارے میں اطلاع ملے تو فوراً پولیس کو آگاہ کریں۔
آپ کی اطلاع اور شناخت مکمل طور پر صیغۂ راز میں رکھی جائے گی۔
ڈسٹرکٹ پولیس کولئی پالس کوہستان کا عزم:
“منشیات سے پاک معاشرہ — ہمارا ہدف، ہماری ذمہ داری!”
