ایبٹ آباد: پیپلز پارٹی کے وفد کی کمشنر ہزارہ سے ملاقات، عوامی مسائل اور مبینہ بدعنوانیوں پر تبادلۂ خیال

ایبٹ آباد: پاکستان پیپلز پارٹی کے ایک وفد نے ڈپٹی جنرل سیکرٹری پیپلز پارٹی خیبرپختونخوا ملک فاروق تنولی اور ضلعی صدر پیپلز پارٹی ایبٹ آباد سید سلیم شاہ کی قیادت میں کمشنر ہزارہ ڈویژن شارخ علی سے ملاقات کی، جس میں ہزارہ ڈویژن بالخصوص ایبٹ آباد میں عوام کو درپیش مسائل، بنیادی سہولیات کی عدم دستیابی اور مختلف سرکاری محکموں میں مبینہ بدعنوانیوں اور انتظامی بے ضابطگیوں کے حوالے سے تبادلۂ خیال کیا گیا۔
ملاقات کے دوران وفد نے کمشنر ہزارہ کی توجہ شہریوں کو درپیش مشکلات کی جانب مبذول کرواتے ہوئے کہا کہ عوامی مسائل کے حل، سرکاری اداروں کی کارکردگی میں بہتری اور انتظامی امور میں شفافیت کو یقینی بنانے کے لیے مؤثر اقدامات کی ضرورت ہے۔ وفد نے مطالبہ کیا کہ سرکاری محکموں میں جواب دہی کا نظام مضبوط بنایا جائے، شہریوں کی شکایات کا بروقت ازالہ کیا جائے اور مبینہ بدعنوانیوں میں ملوث عناصر کے خلاف قانون کے مطابق کارروائی عمل میں لائی جائے۔
اس موقع پر کمشنر ہزارہ ڈویژن شارخ علی نے وفد کی جانب سے پیش کیے گئے مسائل اور تحفظات پر ردعمل دیتے ہوئے متعلقہ معاملات کا جائزہ لینے اور عوامی مشکلات کے حل کے لیے ہنگامی بنیادوں پر اقدامات اٹھانے کی یقین دہانی کرائی۔
وفد میں نائب صدر ہزارہ ڈویژن میر افضل اعوان، صدر پیپلز لائرز فورم بلال سواتی، جنرل سیکرٹری پیپلز پارٹی ایبٹ آباد افتخار احمد تنولی، جوائنٹ سیکرٹری ہزارہ ڈویژن ساجدہ سردار، جنرل سیکرٹری پیپلز پارٹی خواتین ونگ ضلع ایبٹ آباد محترمہ رومش سلیم اور صوبیدار جمشید خان شامل تھے۔
وفد نے امید ظاہر کی کہ ڈویژنل اور ضلعی انتظامیہ عوامی مسائل کے حل، سرکاری محکموں میں شفافیت کے فروغ اور شہریوں کو درپیش مشکلات کے خاتمے کے لیے عملی اقدامات کرے گی، تاکہ عوام کو ریلیف فراہم کرنے کے ساتھ سرکاری اداروں پر اعتماد بھی بحال کیا جا سکے۔