کینٹ پولیس نے ہوائی فائرنگ اور اسلحے کی نمائش کے خلاف کریک ڈاؤن کرتے ہوئے ایک شخص کو گرفتار کر کے اس کے قبضے سے اسلحہ برآمد کر لیا۔ پولیس کے مطابق ملزم عبدالعمر نے ایک شادی کی تقریب کے دوران ہوائی فائرنگ کر کے شہریوں کی زندگیوں کو خطرے میں ڈالا تھا۔
اطلاع ملتے ہی کینٹ پولیس نے فوری کارروائی کی اور ملزم کو آلہ قتل (پستول) سمیت رنگے ہاتھوں گرفتار کر لیا۔ پولیس نے ملزم کے خلاف متعلقہ دفعات کے تحت مقدمہ درج کر لیا ہے۔ ایس ایچ او کینٹ کا کہنا ہے کہ شادی بیاہ یا دیگر تقریبات میں ہوائی فائرنگ کرنے والوں کے ساتھ کوئی رعایت نہیں برتی جائے گی اور قانون کی خلاف ورزی کرنے والوں کو جیل کی ہوا کھانی پڑے گی۔
