ڈسٹرکٹ پولیس آفیسر ہری پور شفیع اللہ گنڈاپور سے صرافہ اینڈ جیولرز ایسوسی ایشن کے صدر نعیم عابد کی قیادت میں ایک وفد نے ملاقات کی۔ ملاقات کے دوران بازاروں میں امن و امان کی صورتحال، جرائم کی روک تھام، سی سی ٹی وی کیمروں کی تنصیب، اور پولیس و تاجر برادری کے درمیان تعاون کو مزید مؤثر بنانے پر تفصیلی گفتگو کی گئی۔
ڈی پی او ہری پور شفیع اللہ گنڈاپور نے وفد سے گفتگو کرتے ہوئے کہا کہ ہری پور پولیس تاجر برادری کو محفوظ اور سازگار ماحول فراہم کرنے کے لیے ہر ممکن اقدامات کرے گی۔ تاجروں کو درپیش مسائل کے حل کے لیے دستیاب تمام وسائل بروئے کار لائے جائیں گے۔ انہوں نے بازاروں میں سکیورٹی انتظامات کو بہتر بنانے، سی سی ٹی وی کیمروں کی تنصیب اور بروقت معلومات کے تبادلے کی اہمیت پر زور دیا۔
ڈی پی او نے مزید کہا کہ عوامی مسائل کے حل کے لیے عملی اقدامات کیے جا رہے ہیں اور ضلع بھر میں کھلی کچہریوں کا انعقاد شروع کر دیا گیا ہے۔ جرائم پیشہ عناصر کے خلاف زیرو ٹالرنس پالیسی اپنائی جائے گی اور قانون کی عملداری کو ہر صورت یقینی بنایا جائے گا۔
