.سوات: خاتون سے مبینہ زیادتی کے الزام میں دو پولیس اہلکار گرفتار، واقعے کا مقدمہ درج

سوات: سوات میں ایک خاتون کے ساتھ مبینہ جنسی زیادتی کے سنگین الزام میں دو پولیس اہلکاروں کو گرفتار کر لیا گیا ہے۔ واقعے کی اطلاع ملنے پر تھانہ رحیم آباد پولیس نے فوری کارروائی کرتے ہوئے سی سی ٹی وی فوٹیج کی مدد سے دونوں مبینہ ملزمان کو ٹریس کیا اور حراست میں لے لیا۔
تفصیلات کے مطابق گزشتہ شب پشاور سے تعلق رکھنے والی ایک خاتون نے تھانہ رحیم آباد میں دو نامعلوم موٹر سائیکل سوار افراد کے خلاف مبینہ زیادتی کی شکایت درج کرائی۔ متاثرہ خاتون اپنے شوہر کے ہمراہ سیر و تفریح کی غرض سے سوات آئی ہوئی تھی۔
درج کرائی گئی شکایت کے مطابق دونوں نامعلوم افراد خاتون اور اس کے شوہر کو ایک ہوٹل کے کمرے میں لے گئے، جہاں خاتون نے الزام عائد کیا کہ دونوں افراد نے اس کے ساتھ باری باری جنسی زیادتی کی۔ خاتون کے بیان کے مطابق واقعے کے بعد ملزمان نے کسی کو اطلاع دینے کی صورت میں سنگین نتائج اور جان سے مارنے کی دھمکیاں بھی دیں۔
پولیس نے شکایت موصول ہونے کے بعد فوری تفتیش شروع کی اور ہوٹل سمیت متعلقہ مقامات کی سی سی ٹی وی فوٹیج کی مدد سے دونوں مشتبہ افراد کی شناخت کر کے انہیں گرفتار کر لیا۔
پولیس کے مطابق گرفتار ہونے والے دونوں ملزمان پولیس اہلکار ہیں، جن میں سے ایک کا تعلق پشاور جبکہ دوسرے کا تعلق ملاکنڈ سے بتایا جاتا ہے۔ دونوں کے خلاف تھانہ رحیم آباد میں مقدمہ درج کر کے مزید قانونی کارروائی اور تفتیش شروع کر دی گئی ہے۔
واقعے نے سوات سمیت مختلف حلقوں میں تشویش پیدا کر دی ہے۔ شہری حلقوں کی جانب سے مطالبہ کیا جا رہا ہے کہ معاملے کی شفاف اور غیر جانب دارانہ تحقیقات کی جائیں، متاثرہ خاتون کو مکمل قانونی تحفظ فراہم کیا جائے اور اگر الزامات ثابت ہوں تو ذمہ دار اہلکاروں کے خلاف قانون کے مطابق سخت کارروائی عمل میں لائی جائے۔
ادارتی وضاحت: خبر میں بیان کردہ واقعات شکایت اور ابتدائی پولیس معلومات پر مبنی ہیں۔ ملزمان کے خلاف الزامات کا حتمی تعین تفتیش اور عدالتی کارروائی کے بعد ہوگا۔ متاثرہ خاتون کی شناخت خفیہ رکھی گئی ہے۔