کرسٹیانو رونالڈو کا بڑا اعلان، فیفا ورلڈ کپ 2026 ہوگا آخری عالمی ٹورنامنٹ.

فٹبال کی دنیا کے عظیم ترین کھلاڑیوں میں شمار ہونے والے پرتگال کے کپتان کرسٹیانو رونالڈو نے اعلان کیا ہے کہ جاری فیفا ورلڈ کپ 2026 ان کے بین الاقوامی کیریئر کا آخری عالمی ٹورنامنٹ ہوگا۔
اسپین کے خلاف پری کوارٹر فائنل سے قبل میڈیا سے گفتگو کرتے ہوئے 41 سالہ رونالڈو نے کہا کہ وہ اپنے بین الاقوامی کیریئر کے آخری ورلڈ کپ سے بھرپور لطف اٹھانا چاہتے ہیں اور دباؤ کے بغیر اپنی ٹیم کے لیے بہترین کھیل پیش کریں گے۔
انہوں نے کہا، “یہ میرا آخری ورلڈ کپ ہوگا، لیکن مجھے امید ہے کہ اسپین کے خلاف میچ میرا آخری میچ ثابت نہیں ہوگا اور ہم ٹورنامنٹ میں مزید آگے جائیں گے۔”
پانچ مرتبہ دنیا کے بہترین فٹبالر کا بیلن ڈی اور (Ballon d’Or) ایوارڈ جیتنے والے رونالڈو نے اس تاثر کو بھی مسترد کیا کہ کسی کھلاڑی کی عظمت کا انحصار صرف ورلڈ کپ جیتنے پر ہوتا ہے۔ ان کا کہنا تھا کہ گزشتہ دو دہائیوں سے زائد عرصے کے دوران انہوں نے فٹبال کو اپنی پوری صلاحیت اور جذبے کے ساتھ کھیلتے ہوئے ملک کی خدمت کی ہے۔
انہوں نے کہا کہ ایک دن ہر کھلاڑی کو بین الاقوامی فٹبال کو الوداع کہنا ہوتا ہے، تاہم وہ مطمئن ہیں کہ انہوں نے ہمیشہ اپنی ٹیم اور اپنے ملک کے لیے بھرپور محنت اور قربانی دی ہے۔
عمر اور فٹنس پر ہونے والی تنقید کا جواب دیتے ہوئے رونالڈو نے کہا کہ وہ آج بھی اعلیٰ سطح پر بہترین کارکردگی دکھانے کی صلاحیت رکھتے ہیں۔ ان کے مطابق وہ فٹبال کسی مالی ضرورت کے لیے نہیں بلکہ اپنے شوق اور جنون کی خاطر کھیلتے ہیں۔
رونالڈو نے بتایا کہ وہ رواں ورلڈ کپ میں اب تک تین گول کر چکے ہیں، جو اس بات کا ثبوت ہے کہ ان کی فارم اور فٹنس آج بھی برقرار ہے۔
رواں ٹورنامنٹ میں ازبکستان کے خلاف دو گول کر کے رونالڈو نے ایک اور تاریخی اعزاز اپنے نام کیا۔ وہ فیفا ورلڈ کپ کے چھ مختلف ایڈیشنز (2006، 2010، 2014، 2018، 2022 اور 2026) میں گول کرنے والے دنیا کے پہلے فٹبالر بن گئے ہیں۔
کرسٹیانو رونالڈو نے 2003 میں پرتگال کے لیے بین الاقوامی کیریئر کا آغاز کیا تھا اور وہ ملک کی تاریخ میں سب سے زیادہ بین الاقوامی میچز کھیلنے اور سب سے زیادہ گول کرنے والے کھلاڑی ہیں۔ ان کی قیادت میں پرتگال نے 2016 میں پہلی مرتبہ یورپی چیمپئن شپ (یورو کپ) کا ٹائٹل بھی اپنے نام کیا۔
رونالڈو کے اس اعلان کے بعد دنیا بھر میں ان کے مداح جذباتی ہو گئے ہیں، کیونکہ ورلڈ کپ 2026 پرتگال کی جرسی میں ان کا آخری عالمی ٹورنامنٹ ہوگا۔