پشاور کے علاقے بڈھ بیر میں فائرنگ کا افسوسناک واقعہ، باپ اور بیٹا جاں بحق

پشاور: تھانہ بڈھ بیر کی حدود میں کوہاٹ روڈ کے علاقے باچایانو گھڑی میں فائرنگ کا افسوسناک واقعہ پیش آیا، جس کے نتیجے میں باپ اور بیٹا جاں بحق ہو گئے۔ ذرائع کے مطابق نامعلوم مسلح افراد کی جانب سے کی جانے والی فائرنگ کے نتیجے میں عالمگیر بادشاہ اور ان کا جوان بیٹا موقع پر ہی دم توڑ گئے۔ واقعے کی اطلاع ملتے ہی بڈھ بیر پولیس کی بھاری نفری موقع پر پہنچ گئی، علاقے کو گھیرے میں لے کر جائے وقوعہ سے شواہد اکٹھے کیے اور لاشوں کو تحویل میں لے کر پوسٹ مارٹم کے لیے ہسپتال منتقل کر دیا۔ پولیس نے واقعے میں ملوث ملزمان کی گرفتاری کے لیے سرچ آپریشن شروع کر دیا ہے، جبکہ فائرنگ کے محرکات اور واقعے کے دیگر پہلوؤں کا تعین کرنے کے لیے تحقیقات جاری ہیں۔ پولیس کے مطابق ملزمان کی گرفتاری کے لیے کوششیں جاری ہیں، جبکہ مزید تفصیلات تحقیقات مکمل ہونے پر سامنے آئیں گی۔