سرمایہ کاروں کو ہراسانی سے بچانے کے لیے نیب کی کمیٹی قائم، شکایات کے فوری ازالے کا فیصلہ

قومی احتساب بیورو (نیب) نے سرمایہ کاروں کو ہراسانی سے تحفظ فراہم کرنے اور سرمایہ کاری کے عمل میں سہولت پیدا کرنے کے لیے ایک کمیٹی قائم کر دی ہے۔
نیب کی جانب سے جاری اعلامیے کے مطابق کمیٹی سرمایہ کاروں کو اقتصادی ترقی کے لیے مکمل ادارہ جاتی تعاون فراہم کرے گی اور سرمایہ کاری سے متعلق شکایات کے فوری ازالے میں کردار ادا کرے گی۔
کمیٹی میں کون شامل ہوگا؟
اعلامیے کے مطابق نیب کے ڈپٹی چیئرمین کمیٹی کے چیئرمین ہوں گے، جبکہ پراسیکیوٹر جنرل اس کے رکن ہوں گے۔
کمیٹی کے دیگر ارکان میں ڈائریکٹر جنرل آپریشنز، ڈائریکٹر جنرل ایڈمنسٹریشن اینڈ پروکیورمنٹ (A&P)، بزنس فیسیلیٹیشن سیل کا نمائندہ اور متعلقہ چیمبر آف کامرس کے نمائندے شامل ہوں گے۔ کمیٹی ضرورت کے مطابق کسی اضافی رکن کو بھی نامزد کر سکے گی۔
سرمایہ کاروں کے حقوق کا تحفظ
نیب کے مطابق کمیٹی سرمایہ کاروں کے لیے سہولت اور تحفظ کے منصوبے کے تحت حاصل حقوق کی نگرانی کرے گی۔ اس کے علاوہ سرمایہ کاروں کی شکایات متعلقہ محکموں کے ساتھ رابطہ کاری کے ذریعے ترجیحی بنیادوں پر حل کروائی جائیں گی۔
غیر ضروری ضابطہ جاتی رکاوٹوں کی نشاندہی
اعلامیے میں کہا گیا ہے کہ کمیٹی ایسے ضابطہ جاتی طریقۂ کار کے غلط استعمال کی نشاندہی کرے گی جو سرمایہ کاری میں رکاوٹ بن سکتے ہیں یا بدعنوانی کا سبب بن سکتے ہیں، اور ایسے معاملات کی روک تھام کے لیے اقدامات کرے گی۔
کمیٹی سرمایہ کاروں کی سرمایہ کاری سے متعلق درخواستوں اور شکایات پر کارروائی کے عمل کو بھی بہتر بنانے میں کردار ادا کرے گی۔