.خیبر پختونخوا میں سرکاری گاڑیوں کی جانچ پڑتال کا حکم، 13 سال سے لاپتہ گاڑیوں کا ریکارڈ طلب

پشاور: خیبر پختونخوا کی مشیر برائے اطلاعات و ریلیف ثمر ہارون بلور نے محکمہ اطلاعات اور اس کے ماتحت اداروں میں سرکاری گاڑیوں کی جامع جانچ پڑتال کا حکم دے دیا ہے، جبکہ گزشتہ 13 سال سے لاپتہ اور ناقابلِ سراغ سرکاری گاڑیوں کا مکمل ریکارڈ بھی طلب کر لیا گیا ہے۔
محکمہ اطلاعات کو جاری کردہ ہدایات میں کہا گیا ہے کہ زیرِ استعمال تمام سرکاری گاڑیوں کے رجسٹریشن نمبرز، ماڈل، متعلقہ افسران کے نام اور عہدوں پر مشتمل تفصیلی ڈیٹا فراہم کیا جائے۔ اس کے ساتھ ساتھ ایسی گاڑیوں کی نشاندہی کرنے کی بھی ہدایت کی گئی ہے جو سرکاری ریکارڈ میں موجود ہونے کے باوجود لاپتہ ہیں یا جن کے بارے میں طویل عرصے سے کوئی معلومات دستیاب نہیں۔
مشیر اطلاعات نے متعلقہ افسران کو نوٹسز جاری کرتے ہوئے 72 گھنٹوں کے اندر تمام لاپتہ گاڑیاں پیش کرنے کی ہدایت کی ہے۔ انہوں نے واضح کیا کہ مقررہ مدت میں گاڑیاں پیش نہ کرنے یا ان کے بارے میں تسلی بخش وضاحت فراہم نہ کرنے کی صورت میں غفلت کے ذمہ دار افسران کے خلاف سخت محکمانہ اور قانونی کارروائی عمل میں لائی جائے گی۔
ثمر ہارون بلور نے مزید ہدایت کی ہے کہ پانچ روز کے اندر تمام معلومات کی تصدیق کے بعد ایک جامع رپورٹ ان کے دفتر میں جمع کرائی جائے، جس میں گاڑیوں کی موجودہ صورتحال، ان کے استعمال اور لاپتہ ہونے سے متعلق مکمل تفصیلات شامل ہوں۔
مشیر اطلاعات کے مطابق سرکاری وسائل کا شفاف استعمال، مالی بے ضابطگیوں کی روک تھام اور احتساب کو یقینی بنانا حکومت کی اولین ترجیحات میں شامل ہے۔ اس جانچ پڑتال کا مقصد سرکاری گاڑیوں کے ریکارڈ کو درست بنانا، ممکنہ غفلت کی نشاندہی کرنا اور قومی وسائل کے تحفظ کو یقینی بنانا ہے۔