بیرونِ ملک مقیم پاکستانیوں کے حقوق کا تحفظ اور مسائل کا فوری حل اولین ترجیح ہے، گورنر خیبر پختونخوا فیصل کریم کنڈی

اسلام آباد: گورنر خیبر پختونخوا فیصل کریم کنڈی نے کہا ہے کہ بیرونِ ملک مقیم پاکستانیوں کی فلاح و بہبود، ان کے حقوق کا تحفظ اور درپیش مسائل کا فوری حل ان کی اولین ترجیحات میں شامل ہے۔ ان خیالات کا اظہار انہوں نے اسلام آباد میں اوورسیز پاکستانیز فاؤنڈیشن (او پی ایف) کے بورڈ آف گورنرز کے چیئرمین سید قمر رضا شاہ سے ملاقات کے دوران کیا۔ ملاقات میں خیبر پختونخوا سے تعلق رکھنے والے تارکینِ وطن کی فلاح و بہبود، ان کے مسائل کے حل اور صوبے کے نوجوانوں کے لیے تعلیم و روزگار کے نئے مواقع پیدا کرنے سے متعلق اقدامات پر تفصیلی تبادلہ خیال کیا گیا۔ اجلاس میں خیبر پختونخوا میں بیرونِ ملک مقیم پاکستانیوں کے لیے خصوصی عدالتوں کے قیام کی تجویز کا بھی جائزہ لیا گیا، جہاں تارکینِ وطن ویڈیو لنک کے ذریعے عدالتی کارروائی میں شریک ہو سکیں گے، جبکہ مقدمات کو 90 روز کے اندر نمٹانے کا ہدف تجویز کیا گیا ہے۔ اس کے علاوہ او پی ایف کے تعاون سے خیبر پختونخوا میں عالمی معیار کی یونیورسٹی کے قیام کی تجویز پر بھی غور کیا گیا۔ گورنر فیصل کریم کنڈی نے متعلقہ حکام کو ہدایت کی کہ ان تجاویز پر کام تیز کیا جائے اور ان پر عمل درآمد کے لیے ضروری اقدامات اٹھائے جائیں۔ ملاقات میں صوبے کے نوجوانوں کو عالمی مارکیٹ کی ضروریات کے مطابق فنی اور پیشہ ورانہ مہارتیں فراہم کرنے پر بھی زور دیا گیا تاکہ انہیں بیرونِ ملک روزگار کے بہتر مواقع میسر آ سکیں۔ اس مقصد کے لیے او پی ایف کے تعاون سے بین الاقوامی لیبر مارکیٹ کے تقاضوں کے مطابق تربیتی پروگرام شروع کرنے کی ضرورت پر اتفاق کیا گیا۔ گورنر خیبر پختونخوا کا کہنا تھا کہ صوبے کے نوجوانوں کو بہتر تعلیم، فنی مہارتوں اور روزگار کے مواقع فراہم کرنے کے لیے تمام دستیاب وسائل بروئے کار لائے جائیں گے اور او پی ایف کے ساتھ ادارہ جاتی تعاون کو مزید مضبوط بنایا جائے گا۔