.دیر بالا: تشدد کی وائرل ویڈیو پر پولیس کی فوری کارروائی، دو مرکزی ملزمان گرفتار

دیر بالا: سوشل میڈیا پر کم سن بچے پر تشدد کی وائرل ویڈیو کا نوٹس لیتے ہوئے ریجنل پولیس آفیسر ملاکنڈ زاہد نواز مروت کی ہدایت پر ڈی پی او دیر بالا اسلم نواز نے فوری کارروائی کے احکامات جاری کر دیے۔ ایس ڈی پی او سرکل واڑی فخر عالم خان کی نگرانی میں ایس ایچ او تھانہ واڑی جوہر علی نے پولیس نفری کے ہمراہ کارروائی کرتے ہوئے دو مرکزی ملزمان سعید ولد سرور خان اور یاسین ولد اورنگزیب، ساکنان واڑی، کو گرفتار کر لیا۔ ابتدائی اطلاعات کے مطابق ملزمان نے دیگر افراد کے ہمراہ واٹس ایپ پر پیغام بھیجنے کے معاملے پر عبید نامی کم سن بچے کو مبینہ طور پر تشدد کا نشانہ بنایا۔ واقعے کا مقدمہ درج کرکے مزید تفتیش شروع کر دی گئی ہے، جبکہ دیگر مبینہ طور پر ملوث افراد کی گرفتاری کے لیے بھی کارروائیاں جاری ہیں۔ ڈی پی او دیر بالا اسلم نواز نے کہا ہے کہ بچوں پر تشدد ایک غیر انسانی اور ناقابل قبول عمل ہے اور ایسے واقعات میں ملوث عناصر کے خلاف قانون کے مطابق سخت کارروائی کی جائے گی۔ انہوں نے واضح کیا کہ بچوں کے تحفظ پر کوئی سمجھوتہ نہیں کیا جائے گا۔