.ڈپٹی کمشنر مانسہرہ کی ہدایت پر اچھڑیاں اور شنکیاری میں تجاوزات کے خلاف کارروائی، منی اڈوں کے خاتمے کے لیے بھی لائحہ عمل تیار

مانسہرہ: ڈپٹی کمشنر مانسہرہ کی ہدایت پر ٹی ایم او بفہ پکھل مظہر مظفر نے آج اچھڑیاں اور شنکیاری کا دورہ کیا، جہاں تجاوزات کے خاتمے، سرکاری راستوں کی بحالی اور ٹریفک کے مسائل کا جائزہ لیا گیا۔
دورے کے دوران دکانداروں اور مالکانِ اراضی کو ہدایت کی گئی کہ وہ اپنی دکانوں کے سامنے قائم تجاوزات رضاکارانہ طور پر فوری ختم کریں اور تجاوزات ہٹانے کے بعد باقی ماندہ ملبہ اور تعمیراتی سامان بھی فوری طور پر اٹھائیں تاکہ سرکاری راستوں کو مکمل طور پر بحال اور ہر قسم کی رکاوٹوں سے پاک رکھا جا سکے۔
اس موقع پر ٹی ایم اے کے عملے کی کارکردگی کا بھی جائزہ لیا گیا اور متعلقہ اہلکاروں کو ہدایت کی گئی کہ وہ تحصیل بھر میں باقاعدگی سے گشت کریں اور تجاوزات کے خاتمے کے بعد ان مقامات پر دوبارہ غیر قانونی تجاوزات قائم نہ ہونے دیں۔
مزید برآں، ٹریفک کے مسائل اور منی اڈوں کے خاتمے کے حوالے سے ڈی ایس پی ٹریفک کے ہمراہ شنکیاری کا دورہ بھی کیا گیا، جہاں قائم منی اڈوں کے باعث پیدا ہونے والی ٹریفک کی صورتحال کا جائزہ لیا گیا۔ اس دوران منی اڈوں کے خاتمے اور ٹریفک کی روانی بہتر بنانے کے لیے باہمی مشاورت سے آئندہ کا لائحہ عمل بھی طے کیا گیا۔