اسلام آباد: مولانا فضل الرحمٰن کی رہائش گاہ پر مبینہ غیر قانونی تعمیرات کا نوٹس، 15 روز میں خلاف ورزیاں ختم کرنے کی ہدایت

اسلام آباد: کیپیٹل ڈیولپمنٹ اتھارٹی (سی ڈی اے) کے ڈائریکٹوریٹ آف بلڈنگ کنٹرول (سٹی) نے جمعہ کے روز جمعیت علمائے اسلام (ف) کے سربراہ مولانا فضل الرحمٰن کی وفاقی دارالحکومت کے پوش سیکٹر جی-6 میں واقع رہائش گاہ پر گارڈز روم اور دیگر مبینہ غیر مجاز تعمیرات سے متعلق وارننگ نوٹس جاری کرتے ہوئے 15 روز کے اندر خلاف ورزیاں ختم کرنے کی ہدایت کر دی ہے۔
30 اکتوبر بروز جمعہ جاری کیا گیا نوٹس مولانا فضل الرحمٰن کی رہائش گاہ کے باہر آویزاں کیا گیا، جو جائیداد کے قانونی مالک کے نام جاری کیا گیا ہے۔ نوٹس میں اسلام آباد کیپیٹل ٹیریٹری بلڈنگ کنٹرول ریگولیشنز 2020 (ترمیم شدہ 2023) کے تحت تین مبینہ خلاف ورزیوں کی نشاندہی کی گئی ہے۔ ان میں عمارت کے مقررہ کھلے حصوں (سیٹ بیکس) میں غیر قانونی تعمیرات، سی ڈی اے کی زمین پر گارڈ پوسٹ کی تعمیر اور اتھارٹی کی اراضی پر جنریٹر کی تنصیب شامل ہیں۔
سی ڈی اے کے نوٹس کے مطابق اتھارٹی کے ریکارڈ میں موجود دستاویزات سے ظاہر ہوتا ہے کہ جائیداد کے مالک نے 18 مارچ 2019 کو این او سی (عدم اعتراض سرٹیفکیٹ) کے اجرا کے وقت ایک حلف نامہ جمع کرایا تھا، جس میں یقین دہانی کرائی گئی تھی کہ سیٹ بیک کی خلاف ورزیوں کو تین ماہ کے اندر ختم کر دیا جائے گا اور متعلقہ قواعد و ضوابط پر مکمل عمل درآمد کیا جائے گا۔ تاہم، سی ڈی اے کے مطابق تاحال ان ہدایات پر عمل درآمد نہیں کیا گیا۔
اتھارٹی نے نوٹس میں ہدایت کی ہے کہ جمعہ سے شروع ہونے والی 15 روزہ مدت کے اندر تمام نشاندہی شدہ خلاف ورزیاں ختم کی جائیں۔ سی ڈی اے نے خبردار کیا ہے کہ مقررہ مدت میں قانونی تقاضے پورے نہ کرنے اور مبینہ غیر قانونی تعمیرات ختم نہ کرنے کی صورت میں سی ڈی اے آرڈیننس اور متعلقہ بلڈنگ کنٹرول ریگولیشنز کے تحت کارروائی کی جا سکتی ہے۔ اس کارروائی میں خلاف ورزیوں والے حصوں کو سیل یا مسمار کرنے کے علاوہ جائیداد کی الاٹمنٹ منسوخ کرنے کے لیے کیس شروع کرنا بھی شامل ہو سکتا ہے۔
دوسری جانب نوٹس جاری ہونے کے بعد مولانا فضل الرحمٰن کے صاحبزادے مولانا اسعد محمود نے دعویٰ کیا ہے کہ یہ کارروائی ایک اعلیٰ فوجی افسر کی جانب سے مبینہ تجاوزات کی نشاندہی کرنے پر انتقامی ردعمل ہے۔ اپنے بیان میں انہوں نے کہا کہ مبینہ تجاوزات کے معاملے کا جواب دینے کے بجائے حکام نے ان کے بقول پسِ پردہ ہتھکنڈے اختیار کیے ہیں۔
مولانا اسعد محمود نے سیاسی اختلافات کو ذاتی انتقام میں تبدیل کرنے کے رجحان پر تشویش کا اظہار کرتے ہوئے کہا کہ ایسی کارروائیاں باعثِ تشویش ہیں۔ انہوں نے عوام اور جمعیت علمائے اسلام کے کارکنوں پر زور دیا کہ وہ صورتحال میں ہونے والی پیش رفت سے باخبر اور چوکس رہیں۔