بالاکوٹ: گڑھی حبیب اللہ اور ملحقہ بازاروں میں تجاوزات کے خلاف آپریشن، غیر قانونی سامان ہٹا دیا گیا.

مانسہرہ: صوبائی حکومت اور ڈپٹی کمشنر مانسہرہ کی ہدایات پر اسسٹنٹ کمشنر بالاکوٹ حسرت خان نے ٹی ایم اے بالاکوٹ اور پولیس کے ہمراہ گڑھی حبیب اللہ اور اس کے ملحقہ بازاروں میں تجاوزات کے خلاف آپریشن کیا۔ کارروائی کے دوران دکانوں کے باہر اور عوامی گزرگاہوں پر رکھا گیا سامان اور دیگر غیر قانونی تجاوزات ہٹا دی گئیں، تاکہ سڑکوں کو کشادہ کرنے، ٹریفک کی روانی برقرار رکھنے اور عام شہریوں کو آمدورفت میں سہولت فراہم کرنے کے اقدامات یقینی بنائے جا سکیں۔ اس موقع پر دکانداروں کو ہدایت کی گئی کہ وہ سرکاری اراضی، فٹ پاتھوں اور عوامی گزرگاہوں پر قبضہ کرنے سے گریز کریں اور بازاروں کے راستوں کو ہر قسم کی تجاوزات سے پاک رکھیں، تاکہ پیدل چلنے والوں اور دیگر شہریوں کو مشکلات کا سامنا نہ کرنا پڑے۔ انتظامیہ نے واضح کیا کہ عوامی راستوں کو تجاوزات سے پاک رکھنے کے لیے کارروائیاں بلا تعطل جاری رہیں گی۔