.مانسہرہ: شاہراہِ ریشم پر تجاوزات کے خلاف آپریشن تیز، اسسٹنٹ کمشنر نے کارروائیوں کا معائنہ کیا

مانسہرہ: صوبائی حکومت کے احکامات اور ڈپٹی کمشنر مانسہرہ کی ہدایات پر شہر میں تجاوزات کے خلاف بلاامتیاز کارروائیاں جاری ہیں، جبکہ شاہراہِ ریشم کو کشادہ اور شہریوں کے لیے آمدورفت میں آسانی پیدا کرنے کے اقدامات تیز کر دیے گئے ہیں۔ اس سلسلے میں اسسٹنٹ کمشنر مانسہرہ محترمہ ثناء فاطمہ نے آج ٹی ایم او مانسہرہ کے ہمراہ شاہراہِ ریشم پر جاری انسدادِ تجاوزات آپریشن کا معائنہ کیا اور کارروائیوں کی نگرانی کی۔ اس موقع پر شاہراہ کے اطراف قائم تجاوزات، غیر قانونی طور پر رکھے گئے سامان اور عوامی گزرگاہوں میں رکاوٹ بننے والی اشیاء کو ہٹانے کے اقدامات کا جائزہ لیا گیا۔ انتظامیہ کے مطابق مانسہرہ شہر کی مختلف شاہراہوں، بازاروں اور تجارتی مراکز میں تجاوزات کے خاتمے کے لیے مسلسل کارروائیاں جاری ہیں، جن کا مقصد شہریوں کو آمدورفت میں سہولت فراہم کرنا، ٹریفک کی روانی برقرار رکھنا اور شہر میں صفائی و نظم و ضبط کو بہتر بنانا ہے۔ اسسٹنٹ کمشنر نے واضح کیا کہ تجاوزات کے خلاف کارروائیاں مستقل بنیادوں پر جاری رہیں گی اور کسی کو بھی سرکاری اراضی یا عوامی گزرگاہوں پر غیر قانونی قبضے کی اجازت نہیں دی جائے گی۔ انہوں نے دکانداروں سے بھی اپیل کی کہ وہ انتظامیہ کے ساتھ تعاون کریں اور اپنی دکانوں کی مقررہ حدود میں رہتے ہوئے کاروبار کریں۔ انتظامیہ نے اس عزم کا اظہار کیا کہ صاف ستھرا، منظم اور تجاوزات سے پاک مانسہرہ بنانے کے لیے اقدامات جاری رکھے جائیں گے۔